بولونيا Bologna 

أبريل ٢٠١٦م

سباغيتي بولونيز … عرفنا المدينة من هذه الأكلة الشهيرة على العموم اذا طلبتها مش حتحصلها هنا لإن الأمريكان حرفوها زي ماحرفوا حضارات وكتب وخلافه … في بولونيا هذه الاكلة تسمى تالياتيللي بولونيز الراجو جربها وحتطلبها في كل وقت ممكن حتى في الفطور واللي معموله هنا شيء ثاني .. المدينة مدينة الأكل مدينة المورتديلا والجبنة مابين كل وجبة ممكن تتسلى في الكافيهات تشرب كابتشينو وتحلي بالتيرامسو وممكن تشوف المعالم السياحية في طريقك للمطاعم ، العجيب ان الأمريكان فاتحين مطعم ماكدونالدز في وسط المدينة مش عارف إِيش الجرأة هذي والوقاحة هنا في عاصمة الأكل الأيطالي !!

  
  
سال لعابي وأنا اتفرج على الصورة وصدقوني زي مايقول كل المتان ياأخي والله تذوب في الفم .. والله الباستا رقيقة بشكل وتذوب في الفم الصوص فيه شويه حموضة متجانسة مع أسيد الطماطم الأيطالي البانادورا، جربناها في مطعم شهير إسمه باباجالو وماانسى الرجل المسن الأنيق اللي ظل ماسك الباب ليا انا وزوجتي حتى ندخل المطعم ….. بجوار المطعم يوجد أحد المعالم السياحية والأثرية واللي يسمى بالبرجين التوأم تم بناءه في القرن الثاني عشر الميلادي.

  

محلات الخضار واللحوم والأسماك والأجبان والباستا منتشرة في كل مكان  

   

  
ومن الأماكن الهامة ساحة ماجيوري وهي ساحة كبيرة تقام فيها الحفلات والمناسبات وفيها عدد من الكافيهات وفيها نافورة نيبتون الشهيرة طبعاً المدينة فيها أقدم جامعة في أوروبا وهي جامعه مميزة.

   

  

  

وزي مابدينا مع الباستا احب ان انهي مقالي بالحلى آيس كريم الفانيلا بصوص المشمش والكرز والمكسرات يامي يام.